اسلام آباد: سابق وفاقی وزیر فواد چوہدری نے کہا ہے کہ حکومت اور صدر پاکستان نئے چیف جسٹس پاکستان جسٹس منصور علی شاہ کی تقرری کا نوٹی فکیشن جاری کریں۔
اسلام آباد ہائی کورٹ میں توہین عدالت کی درخواست دائر کرنے کے بعد میڈیا سے بات کرتے ہوئے ان کا کہنا تھا کہ غیر یقینی کی صورتحال ختم کرنے کے لیے حکومت اور صدر پاکستان نئے چیف جسٹس پاکستان جسٹس منصور علی شاہ کی تقرری کا نوٹی فکیشن جاری کریں،
سپریم کورٹ اس چیز کی وضاحت کرے کہ ایڈہاک ججز سیاسی مقدمات کی سماعت نہیں کریں گے سپریم کورٹ اس بات کی بھی یقین دہانی کروائے کہ جس مقصد کے لیے انہیں لایا گیا ہے
کہ زیر التوا کیسز کی تعداد کم ہو اسی مقصد کے لیے ایڈہاک ججز کام کریں گے۔
انہوں نے کہا کہ پی ٹی آئی سوشل میڈیا سے وابستہ بچی سیدہ عروبہ کی ضمانت ہوئی اس بات پر مبارکباد پیش کرتا ہوں، بچوں کو گرفتار کرکہ یہ اپنا بیانہ بنانے کی ناکام کوشش کر رہے ہیں۔
کراچی: پاکستان اسٹاک ایکسچینج میں تیزی کا رجحان ہے، اس دوران انڈیکس کی 79 ہزار پوائنٹس کی نفسیاتی سطح بحال ہو گئی ہے۔
کاروباری ہفتے کے پہلے دن پی ایس ایکس میں تیزی کا رجحان جاری ہے اور گزشتہ ہفتے چھائے رہے شدید مندی کے بادل چھٹنے سے سرمایہ کاروں کا اعتماد بحال ہوا ہے۔
پیر کے روز بازارِ حصص میں کاروبار کا آغاز تیزی کے ساتھ ہوا اور انڈیکس میں 1019 پوائنٹس تک کی تیزی دیکھی گئی۔کاروبار کے دوران کے ایس ای 100 انڈیکس 79000 پوائنٹس کی نفسیاتی سطح پر بحال ہوکر 79048 پوائنٹس پر ٹریڈ کررہا ہے۔
راولپنڈی میں بجلی کی قیمتوں میں مسلسل اضافے، ٹیکسز کی بھرمار اور مہنگائی کے خلاف جماعت اسلامی کا لیاقت باغ میں احتجاجی دھرنا چوتھے روز میں داخل ہوگیا۔
شرکاء کا جوش وخروش برقرار ہے اور نعرے بازی کی جارہی ہے۔ خواتین بھی دھرنے کا حصہ بن گئیں اور ان کیلئے الگ پنڈال بن گیا، میٹرو بس سروس تین روز کی بندش کے بعد آج چوتھے روز بحال ہوگئی ہے۔
امیر جماعت اسلامی حافظ نعیم الرحمن نے تاجروں، اساتذہ اور لیبر تنظیموں کو بھی آج سے دھرنے میں شرکت کی دعوت دی ہے۔ جماعت اسلامی اور حکومتی ٹیموں میں آج مذاکرات کا اہم دور ہوگا۔
دھرنے کے باعث ملحقہ بازاروں اور روڈز پر تجارتی کاروباری سرگرمیاں متاثر ہوئی ہیں۔ ٹریفک بھی جام رہنے لگا ہے ۔
جماعت اسلامی نے دھرنے کو لیاقت باغ چوک سے لیاقت باغ کے اندر منتقل کرنے کی حکومت کی درخواست مسترد کرتے ہوئے کہا ہے کہ دھرنا یہاں سے آگے اسلام آباد کی جانب بڑھے گا۔
کراچی میں گزشتہ شب رواں ماہ کی دوسری گرم ترین رات ریکارڈ ہوئی ہے، اس سے قبل یکم جولائی کو کم سے کم درجہ حرارت 32 ڈگری سینٹی گریڈ ریکارڈ ہوا تھا۔
شہر قائد گزشتہ ماہ سے شدید گرمی کی لہر کی لپیٹ میں ہے، جس کی وجہ سے شدید حبس اور موسم کی شدت سے شہری بے حال ہیں۔
محکمہ موسمیات کے مطابق یکم جولائی 2024ء کو کراچی میں گرم ترین رات ریکارڈ ہوئی تھی، جس کے بعد آج 17 جولائی کی شب بھی شہر میں 32 ڈگری سینٹی گریڈ درجہ حرارت کے ساتھ دوسری مرتبہ گرم ترین رات ریکارڈ ہوئی واضح رہے
کہ یورپی موسمیاتی تبدیلی کے ادارے نے اپنی رپورٹ میں بتایا تھا کہ جون 2024 کے درجہ حرارت نے انسانی تاریخ میں آنے والے تمام جون کے مہینوں کا ریکارڈ توڑ دیا ہے۔
پچھلے سال 2023 کا جون ریکارڈ پر گرم ترین مہینہ تھا جس کے بعد جولائی تھا جو عالمی سطح پر سب سے زیادہ گرم مہینہ تھا۔
پشاور: خیبر، کرم اور بلوچستان میں کوئلے کی کانوں میں حادثات کے نتیجے میں شانگلہ کے 6 مزدور جاں بحق ہو گئے۔میڈیا ذرائع کے مطابق کوئلے کی کانوں کے مختلف حادثات میں شانگلہ کے 6 مزدوروں کے جاں بحق ہونے کے علاوہ 2 مزدور زخمی بھی ہوئے ہیں۔
درہ آدم خیل میں کوئلے کی کان میں زہریلی گیس پھٹنے سے 3 کان کن جاں بحق ہو گئے، جن میں سلیمان، عبدالہادی اور حبیب گل شامل ہیں۔
اس کے علاوہ بلوچستان میں کوئلے کی کان میں تودہ گرنے سے شانگلہ کے 2 مزدور جاں بحق ہو گئے، جن میں امان اللہ اور آفتاب شامل ہیں۔
دوسری جانب ضلع کرم میں کوئلے کی کان میں پیش آنے والے حادثے میں عجب خان نامی مزدور جاں بحق ہوگیا۔
وزیراعلیٰ خیبر پختونخوا علی امین گنڈاپور نے کوئلے کی کان کے مختلف حادثات میں جاں بحق ہونے والے مزدوروں کے سوگوار خاندانوں سے دلی ہمدردی اور تعزیت کا اظہار کیا ہے۔
انہوں نے جاں بحق مزدوروں کی مغفرت اور پسماندگان کے لیے صبر جمیل کی دعا کی۔ علی امین گنڈاپور کا کہنا تھا کہ ہم سوگوار خاندانوں کے غم میں برابر کے شریک ہیں۔
کراچی: وزیراعلیٰ سندھ سید مراد علی شاہ نے کہا ہے کہ پیپلز پارٹی کسی بھی سیاسی جماعت پر پابندی کے حق میں نہیں ہے۔
وزرا اور میئر کراچی کے ہمراہ کراچی میں جلوسوں کی سیکیورٹی انتظامات کا جائزہ لینے کے بعد میڈیا سے گفتگو میں وزیراعلیٰ نے کہا کہ سیاسی جماعت اور بانی کو کچھ اقدامات کرنا ہوں گے جو وہ نہیں کر رہے۔
مراد علی شاہ نے کہا کہ ملک میں دہشتگردی کی نئی لہر جاری ہے اور حالات کو سامنے رکھتے ہوئے سیکیورٹی کے بہترین انتظامات کیے گئے، جلوس کے اختتام تک سیکیورٹی کا جائزہ لیتا رہوں گا۔ انہوں نے کہا کہ لوکل گورنمنٹ ڈیپارٹمنٹ اور کے ایم سی بھی انتظامات کے لیے متحرک ہے جبکہ سندھ پولیس اور رینجرز سمیت دیگر سیکیورٹی ادارے بھی چوکس ہیں۔
وزیراعلیٰ سندھ نے کہا کہ پہلے جو میئر آتے تھے وہ اختیارات اور فنڈز کا رونا روتے تھے لیکن مرتضیٰ وہاب وہ میئر ہیں جو آتے ہیں جب انہیں شہر کی بہتری کے لیے صلاح مشورہ درکار ہوتا ہے،
صرف فنڈز کے لیے انتظامی امور میں بھی مدد کے لیے میئر کراچی ہمیشہ رابطے میں رہتے ہیں۔
قبل ازیں، وزیر اعلیٰ سندھ سید مراد علی شاہ نے مرکزی تنظیم عزاداری پاکستان کیمپ کا دورہ بھی کیا جہاں تنظیم کے عہدیداروں سے انتظامات کے حوالے سے بات چیت کی۔
سری نگر : مقبوضہ کشمیر میں 10 محرم الحرام کو نکلنے والے تاریخی مرکزی جلوس پر مودی سرکار نے امن و امان میں خلل کا بہانہ بناکر پابندی عائد کردی جس پر عزاداروں میں غم و غصے کی لہر دوڑ گئی۔
کشمیر میڈیا سروس کے مطابق مقبوضہ کشمیر کی بھارت نواز کٹھ پتلی انتظامیہ نے یہ پابندی 8 محرم کے جلوس میں فلسطین کے حق اور اسرائیل کی مخالفت میں نعرے بازی کے بعد عائد کی۔
بھارتی پولیس نے رات گئے سرچ آپریشن کے دوران 8 محرم کے جلوس میں اسرائیل کے خلاف نعرے بازی کرنے والے درجنوں نوجوانوں کو شناخت کے بعد حراست میں لے لیا۔
جلوس کے منتظمین نے تصدیق کی انھیں جلوس نہ نکالنے کا حکم نامہ موصول ہوگیا ہے۔ ہم حیران ہیں کہ اگر امن و امان کا مسئلہ تھا تو پھر حال ہی میں یہاں الیکشن کس طرح ہوگئے؟
مقبوضہ کشمیر کے مقامی حریت رہنما نے کہا کہ مودی سرکار الیکشن کے بائیکاٹ کا بدلہ مذہبی پابندیاں عائد کرکے لے رہی ہے تاکہ کشمیریوں کے جذبات کے ساتھ کھیلا جا سکے۔
واشنگٹن: امریکا کے انٹیلی جنس اداروں کو انتخابی مہم کے دوران سابق صدر ڈونلڈ ٹرمپ کو قتل کرنے کی ایرانی سازش کی معلومات ملی تھیں۔
امریکی نشریاتی ادارے “سی این این” کی ایک رپورٹ میں ذرائع کے حوالے سے دعویٰ کیا گیا ہے کہ ٹرمپ کے قتل کی ایرانی سازش کی معلومات گزشتہ چند ہفتوں کے دوران موصول ہوئی تھیں۔
سی این این کی رپورٹ کے مطابق حال ہی میں امریکی سیکرٹ سروس ادارے نے ڈونلڈ ٹرمپ کی انتخابی مہم کو بڑھتے ہوئے خطرے کے بارے میں آگاہ بھی کیا تھا۔
گو وائٹ ہاؤس نے امریکی سیکرٹ ادارے کے ’’تھریٹ الرٹ‘‘ پر تبصرے سے انکار کر دیا لیکن یہ واضح بھی کیا کہ اب تک کی تحقیقات میں ٹرمپ پر قاتلانہ حملے میں کسی بھی غیرملکی یا امریکی شراکت دار کے ثبوت نہیں ملے ہیں۔
وائٹ ہاؤس میں قومی سلامتی کونسل کی ترجمان اڈریان واٹسن نے بتایا کہ جنرل قاسم سلیمانی کی ہلاکت کا بدلہ لینے کے لیے ٹرمپ انتظامیہ کے کئی سابق ذمے داران پر ایران نے قاتلانہ حملوں کی دھمکی دی تھی۔ترجمان اڈریان واٹسن نے مزید بتایا کہ ہم کئی برسوں سے ان دھمکیوں پر نظر رکھے ہوئے ہیں کیوں کہ یہ قومی اور داخلی سلامتی کا معاملہ اور ہماری اولین ترجیح میں شامل ہے۔
دوسری جانب اقوام متحدہ میں ایرانی مشن کی جانب سے جاری بیان میں ٹرمپ کے قاتلانہ حملے میں ایران کے کردار کے الزام کو بے بنیاد قرار دیتے ہوئے کہا کہ ان الزامات کے پیچھے ایک خاص مقصد ہے۔
ایرانی مشن کے بیان میں کہا گیا ہے کہ اسلامی جمہوریہ ایران کے نزدیک جنرل قاسم سلیمانی کے قتل کا حکم دینے پر ڈونلڈ ٹرمپ مجرم ہیں لیکن ان کے خلاف عدالت میں قانونی کارروائی اور سزا چاہتے ہیں۔
یاد رہے کہ چند روز قبل ریاست پنسلوانیا کے انتخابی جلسے میں ڈونلڈ ٹرمپ پر فائرنگ کی گئی تھی اور گولی ان کے کان کو چھو کر گزرگئی تھی۔ حملہ آور کو جوابی فائرنگ میں مار دیا گیا تھا۔
حملہ آور کی شناخت 20 سالہ تھامس کے نام سے ہوئی تھی جس نے اپنی آخری سوشل میڈیا پوسٹ میں لکھا تھا کہ میں ٹرمپ اور ریپبلکن سے نفرت کرتا ہوں۔
