سیلاب متاثرین کی بحالی کیلئے ڈونرز کانفرنس کا انعقاد جلد کیا جائیگا، وزیر اعظم
عالمی رہنماﺅں کو موسمیاتی تبدیلی کے پاکستان پر تباہ کن اثرات اور موسمیاتی تبدیلی کے حوالے سے پاکستان کے نقطہ نظر سے آگاہ کیا گیا
لندن (این این آئی)وزیر اعظم محمد شہباز شریف نے کہاکہ اقوام متحدہ کے سیکرٹری جنرل انتونیو گوتیرس نے یقین دہانی کرائی ہے کہ سیلاب متاثرین کی بحالی کیلئے ڈونرز کانفرنس کا انعقاد جلد کیا جائیگا۔
وزیراعظم نے لندن سے بذریعہ ویڈیو لنک پاکستان میں سیلاب زدہ علاقوں میں بحالی کے کاموں کا جائزہ لینے کے لیے ایک اہم اجلاس کی صدارت کی۔
اجلاس میں وفاق وزراءاور متعلقہ حکام نے شرکت کی۔ وزیر اعظم آفس میڈیا ونگ کی جانب سے اتوار کو جاری پریس ریلیز کے مطابق متاثرین سیلاب کی بحالی کے حوالہ سے منعقدہ اجلاس کے دوران وزیراعظم نے کہا کہ اقوام متحدہ جنرل اسمبلی کے حالیہ اجلاس کے دوران ان کی اقوام متحدہ کے سیکرٹری جنرل انتونیو گو تیرس سمیت دنیا بھر کی اہم قیادت سے ملاقاتیں ہوئیں۔
جن میں انہوں نے عالمی رہنماﺅں کو پاکستان میں سیلاب سے ہونے والی تباہی اور اس سلسلے میں حکومت کی طرف سے کی جانے والی امدادی کاروائیوں اور بحالی کی کوششوں کے بارے آگاہ کیا۔ انہوں نے سعودی ولی عہد محمد بن سلمان بن عبدالعزیز السعود سے اپنی ٹیلیفونک گفتگو کا بھی ذکر کیا۔
وزیر اعظم نے کہا کہ عالمی رہنماﺅں کو موسمیاتی تبدیلی کے پاکستان پر تباہ کن اثرات اور موسمیاتی تبدیلی کے حوالے سے پاکستان کے نقطہ نظر سے آگاہ کیا گیا۔
عالمی رہنماﺅں کی جانب سے پاکستان میں سیلاب سے ہونے والے نقصانات پر ہمدردی اور تعزیت کا اظہار کیا گیا اور یہ یقین دلایا گیا کہ پورے خلوص کے ساتھ پاکستان کی مدد کی جائیگی۔
انہوں نے کہا کہ بل اینڈ میلنڈا گیٹس فاونڈیشن کے شریک چیئرمین بل گیٹس سے ملاقات کے دوران سیلاب زدہ علاقوں میں بچوں کی خوراک کے لیے ورلڈ فوڈ پروگرام سے مدد لینے کی بات بھی زیر بحث آئی۔
ہمیں بھیک نہیں عالمی برادری سے انصاف چاہیے:وزیر خارجہ
وزیراعظم نے کہا کہ عالمی برادری اور پاکستانی اداروں کی کوششوں سے ہم انشائاللہ جلد اس مشکل سے نکل آئیں گے۔ وزیراعظم کو نیشنل فلڈ رسپانس کوآرڈینیشن سینٹر کے حکام کی جانب سے ملک بھر میں سیلاب زدہ علاقوں میں بحالی کے کاموں کے حوالے سے بریفنگ بھی دی گئی۔
