پاکستان جونیئر لیگ میں آل راﺅنڈرز کی تلاش میرا ہدف ہے ،عبد الرزاق
پاکستان جونیئر لیگ میں آل راﺅنڈرز کی تلاش میرا ہدف ہے ،عبد الرزاق
لاہور( آوازنیوز)پاکستان کرکٹ ٹیم کے سابق آل راﺅنڈر عبدالرزاق نے پاکستان جونیئر لیگ میں آل راﺅنڈرز کی تلاش کو ہدف قرار دیتے ہوئے کہا ہے کہ میں آل راﺅنڈرز کو نظر میں رکھوں گا اور امید ہے لیگ سے آل راﺅنڈرز ملیں گے جنہیں تلاش کر کے ان پر کام کروں گا اور مزید بہتری لانے کی کوشش کروں گا۔
انہوںنے کہا کہ پاکستان جونیئر لیگ نوجوان کرکٹرز کے لیے ایک پریشر والا ٹورنامنٹ ہے، ان کرکٹرز کو ٹیسٹ سینٹر پر کھیل کر انٹرنیشنل کرکٹ کا ایک احساس مل رہا ہے جہاں ابھی انگلینڈ کی کرکٹ ٹیم کھیل کر گئی ہے۔
انہوں نے کہا کہ لیگ میں معیاری پچز اور گراﺅنڈ بھی بڑے ہیں کیونکہ ابھی لیگ کی شروعات ہے، آہستہ آہستہ نوجوان کرکٹرز سیٹ ہو جائیں گے اور بڑے اسکور ہوں گے۔
عبدالرزاق نے بتایا کہ میں کوچنگ کر کے بہت خوش ہوتا ہوں، میدان میں نوجوانوں کے ساتھ عملی طور پر کام کرتا ہوں، کھلاڑیوں کی اسکلز کو بہتر کرنے کے ساتھ ان کو ذہنی طور پر مضبوط بنانا ہے ۔
عبدالرزاق نے مزید کہا کہ ٹی ٹونٹی ورلڈ کپ میں پاکستان ٹیم بہت اچھا پرفارم کرے گی، پاکستان ٹیم کو دنیا کی بہترین ٹیم مانتا ہوں۔اس حوالے سے انہوں نے کہا کہ اس کی وجہ یہ نہیں ہے کہ میں پی سی بی کا حصہ ہوں اور ملازم کی حیثیت سے کہہ رہا ہوں،
ایشیا ءکپ اور انگلینڈ کے خلاف سیریز میں بدقسمتی کہ وجہ سے نہ جیت سکے حالانکہ پاکستان کے پاس میچ ونر بیٹرز اور بولرز ہیں اس لیے ٹی ٹونٹی ورلڈ کپ میں پاکستان ٹیم اچھا پرفارم کرے گی۔
سابق آل راﺅنڈر عبدالرزاق پاکستان جونیئر لیگ میں حیدر آباد ہنٹرز کے کوچ ہیں۔
