کشمیری عوام کو شدید مشکلات اور چیلنجوں کا سامنا ہے:فاروق عبداللہ
جموں(آواز نیوز)غیر قانونی طورپر بھارت کے زیر قبضہ جموں وکشمیر میںنیشنل کانفرنس کے سرپرست اعلیٰ ڈاکٹر فاروق عبداللہ نے کہا ہے کہ مودی حکومت کی طر ف سے اگست2019میں جموں وکشمیر کی خصوصی حیثیت کی منسوخی کے بعد سے کشمیری عوام کوشدید مصائب ، مشکلات اور چیلنجوں کا سامنا ہے۔
جن کی مثال ماضی میں نہیں ملتی۔کشمیر میڈیا سروس کے مطابق ڈاکٹر فاروق عبداللہ نے جموں مختلف عوامی وفود کیساتھ گفتگو کرتے ہوئے کہا کہ مقبوضہ کشمیر کی موجودہ سنگین صورتحال کے پیش نظر تمام مقامی سیاست دانوں کوذاتی مفادات اور سیاسی نظریات سے بالا تر ہو کر مظلوم اور محکوم کشمیری قوم کو موجودہ دلدل سے نکالنے کیلئے کوششیں کرنی چاہیں۔
انہوں نے کہاکہ انہوں نے کہاکہ کشمیری عوام کے حقوق کی بحالی کیلئے مشترکہ طورپرآئینی، جمہوری اور سیاسی جدوجہد وقت کی اہم ضرورت ہے۔فاروق عبداللہ نے کہاکہ کشمیری عوام کے مفادات کا دفاع کرنا اور چھینے گئے ان کے آئینی اور جمہوری حقوق کی بحالی نیشنل کانفرنس کا بنیادی ایجنڈا ہے۔
انہوں نے کہا کہ نیشنل کانفرنس اپنے ا س ایجنڈا پر چٹان کی طرح قائم ہے۔انہوں نے کہاکہ انکی جماعت کشمیری عوام کے حقوق سلب کرنے میں ملوث اور عوام کو مذہبی، علاقائی اور لسانی بنیاوں پر تقسیم کرنے والے عناصر کو بے نقاب کرے گی۔
فاروق عبداللہ نے کہا کہ بھارت کو مقبوضہ علاقے میں امن و امان کی صورتحال میں بہتری کیلئے کشمیری عوام کے آئینی اور جمہوری حقوق بحال کرنے ہوں گے اور اس عمل میں تاخیر سے حالات مزید پیچیدہ ہوتے جائیں گے۔
انہوں نے کشمیری عوام سے اپیل کی کہ وہ اپنی صفوں میں اتحاد و اتفاق قائم رکھیں کیونکہ اسی میں ہماری کامیابی کا راز مضمر ہے۔
Kashmiri people face severe difficulties Farooq Abdullah Latest Kashmir News inUrdu
